Aaj Ke Daur Mein Salaam Kyun Itna Zaroori Hai?

Aaj ka daur ajeeb hai. Hum roz logon ke paas se guzarte hain,

• lift mein kharay hotay hain,
• masjid ke bahar milte hain,
• school, college, office  
• har jagah chehre hi chehre. 

Lekin zyada tar chehre khamosh hotay hain.

1. Mobile haath mein hota hai,
2. nazar neeche hoti hai,

aur saamne jo Musalman khara hota hai uske liye bas ek formal si muskurahat  salaam nahi.

Phir hum kehte hain:

“Ummat mein mohabbat nahi rahi.”

Sawal yeh hai:

Kya humne mohabbat ka sabse pehla darwaza khula rakha hai? Us darwaze ka naam hai: Assalamualaikum.

Assalamualaikum — Sirf Greeting Nahi 

Hum roz kehte hain: Assalamualaikum, lekin aksar yeh soche baghair kehte hain ke hum asal mein keh kya rahe hain.

Assalamualaikum ka matlab hai:

“Tum par salaamati ho, tum aman mein raho, Allah tumhari hifazat kare.”

Socho…

jab tum kisi ko salaam karte ho, tum asal mein uske liye dua kar rahe hotay ho.

Aur dua ke waqt kya kabhi yeh dekha jaata hai ke yeh chhota hai ya bada? gareeb hai ya ameer? meri level ka hai ya nahi?

Nahi.

Dua mein darja nahi hota. 

Qur’an Salaam Ko Kitni Ahmiyat Deta Hai

Allah Ta‘ala Qur’an mein farmata hai:

“Aur jab tumhein salaam kiya jaye, toh tum us se behtar salaam do, ya kam az kam wahi salaam lauta do.”

(Surah An-Nisa 4:86)

Yeh sirf jawab dene ka hukm nahi, Yeh akhlaaq ki training hai. Allah chahte hain ke salaam be-dili se na ho, aadat ke taur par na ho, balkay behtar tareeqe se ho.

Nabi ﷺ Kya Chahte The?

 Allah ke Rasool ﷺ ne farmaya:

“Apas mein salaam ko aam karo.”

(Sahih Muslim)

Aam karo…

yaani sirf apni age walon tak nahi, sirf jaan-pehchaan walon tak nahi, sirf apni soch ke logon tak nahi. 

Har Musalman tak.

Salaam, Mohabbat Aur Jannat

Allah ke Rasool ﷺ ne farmaya:

“Tum Jannat mein dakhil nahi ho sakte jab tak iman na lao, Aur tum iman walay nahi ho sakte jab tak aapas mein mohabbat na ho. Kya main tumhein aisi cheez na bataun jisse tum aapas mein mohabbat karne lago?” Sahaba ne kaha: Kyun nahi, Ya RasoolAllah ﷺ. 

Aap ﷺ ne farmaya:

“Apas mein salaam ko aam karo.”

(Sahih Muslim)

Socho zara… salaam ko aam karna Sirf adab nahi, Jannat ka raasta hai.

Bada Chhote Ko Salaam Kare — Sunnat

Aaj ka culture kehta hai: “Main bada hoon, pehle woh kare.” Lekin Sunnat kuch aur kehti hai.

Hazrat Anas bin Malik (Radiyallahu Anhu) farmate hain:

“Allah ke Rasool ﷺ bachchon ko bhi salaam kiya karte the.”

(Sahih Bukhari)

Nabi ﷺ ka maqam dekho aur phir unki tawazu dekho. Aaj hum sirf is liye salaam nahi karte ke kahin hamara ego chot na kha jaye.

Aaj Salaam Kyun Kam Ho Gaya?

Aaj: ego zyada hai, mohabbat kam hai, aur sunnat ko optional samajh liya gaya hai.

Hum chahte hain log humein izzat dein, lekin hum pehle izzat dene ko tayar nahi.

Salaam jhukna nahi, salaam jodna hai.

Aaj Se Sirf Ek Chhota Sa Amal

• Kal jab ghar se niklo,
• masjid jao,
• gali se guzro,
• office pohoncho —

ek kaam zaroor karna:

Chhota ho ya bada — salaam karna.

Jaan-pehchaan ho ya na ho — salaam karna.

Shayad tumhein andaza na ho, lekin tumhara ek Assalamualaikum kisi ke dil ka bojh halka kar sakta hai.

Kyunkay yaad rakho: Assalamualaikum

sirf lafz nahi, ek zinda dua hai.

Ya Allah,

humein salaam ko zinda rakhne wala bana,

aur hamare dilon mein mohabbat paida farma.

Aameen.